معلومات للقادمين الجدد حول الدراسة في معاهد اونتاريو
(في Ontario فقط)
دراسة اللغة في مدارس Link:
هي مدارس مفتوحة بشكل مجاني للقادمين الجدد و هيي اللي بينصحو فيها بمراكز ال new comers بعد فحص الانكليزي اللي بيعملوه للقادمين الجدد و عأساس هالفحص بيتحدد مستواك بالمدرسة من ١ ل ٨ .
اغلب هالمدارس بتطلب يكون معك PR لتقبلك بالمدرسة.
سلبياتها:
التدريس فيها غير كافي ابدا و ما في تطور باللغة
لايأخد الطالب فيها Osap
ميزاتها:
اغلبهم فيهم حضانة مجانية من ضمن المدرسة للاطفال تحت عمر المدرسة يعني الام بتترك ابنها بالحضانة و بتطلع عدرسها بنفس البناء.
اذا مافي دييكير بالمركز فممكن الاستفادة من خدمات الsubsidy (سيتم شرحها لاحقا)
الدوام عادة بهالمدارس بيكون من ٩ صباحا لل ٢ ونص و ممكن تسجل part time من ٩ صباحا لل ١٢ ونص .
دراسة اللغة في College:
في برامج اسمها
Esl (English as a second language)
موجودة بأغلب colleges في اونتاريو .
مو مطلوب للدخول اله اي شهادة سابقة.
ميزاته:
الدراسة فيه جدية و فيه وظايف و presentations و علامات و معدل.
تطور الطالب كتير كبير فيه باللغة (اذا درس) و خصوصا بال writing و speaking
الطالب ياخذ Osap عليه
موجود تأمين صحي عن طريق الكوليج.
الاستفادة من خدمات ال Subsidy
لايوجد علامات عالحضور . الا طبعا اذا في فحص
من بعد التخرج منه بيحق للطالب يدخل اي اختصاص فورا بعدة colleges بدون مايضطر يكون معه ايلتس او اي شي.
سلبياته:
سلبية وحدة اللي هيي الدوام فيه صعب و مو محدد بوقت واحد يعني تقريبا في دوام يوميا حوالي ٥ ساعات مابين ٩ الصبح لل ٥ المسا يعني ممكن من ١ لل ٤ ممكن من ٩ لل ١ و هكذا.
هالمشكلة ممكن تنحل بفضل خدمات ال subsidy عن طريق تسجيل الاطفال after school program (سيتم شرحها لاحقا)
ما هو Osap:
هي مساعدات من حكومة اونتاريو للطلاب
الاوساب عبارة عن قسمين: grant يعني منحة و loan يعني قرض.
المنحة هيي ليد الطالب فورا و مافي عليها tax و لا تعتبر income.
القرض هوي القسم اللي بدو يرجعه الطالب بعد ما يخلص دراسة.
مبلغ ال grant و loan بيعتمد حسب حالة الطالب و كتير بيختلف بين طالب و طالب.
اكتر شغلتين بيعتمد عليهم هالقسمين هنن : الدخل و عدد الاولاد.
مثال واقعي حتى ينفهم القصد:
المثال الاول:
صبية متزوجة عندها طفلين صغار و دخل زوجها حوالي 60 الف بالسنة
دخلت اختصاص انكليزي esl
رح يطلعلها بالاوساب مايلي:
2000 دولار تقريبا بالشهر منحة لألها بيوصلوها لحسابها
1000 دولار قرض كمان بيجيها لحسابها لكنها ملزمة ترجع هالقرض للحكومة بس تتخرج و توقف دراسة.
ملاحظة مهمة: يمكن للطالب الغاء استلام القرض يعني بيصير ياخد فقط المنحة فقط
المثال الثاني:
صبية غير متزوجة مع اهلها
رح تحصل تقريبا على
منحة 300 دولار بالشهر
قرض 1800 دولار بالشهر
الارقام غير دقيقة لكنها تقريبية.
ما هي Subsidy:
هي منظمة حكومية بتساعد الأهل اللي عم يشتغلو او يدرسو full time حصرا و دخلهم قليل .
بتساعدهم بالدفع لل care centers اللي ممكن يحتاجوها لأطفالهم متل :
Day care centers
After/ before school
March break camp
Summer camp
Pd days
مبلغ المساعدة بيكون حسب دخل العائلة
اذا مافي دخل فبيغطو التكاليف كللها . اذا في دخل لل ٦٠ الف بالسنة يعني low income فبيغطو نسبة كبيرة كتير من المبلغ
بالنسبة للدراسة اونلاين حاليا:
مافي علامات على الحضور.
المحاضرات مسجلة يعني ممكن تحمليها و سماعها بالوقت اللي بيناسبك.
مراعاة وضع الامهات يعني مثلا الفحص اذا بوقت ما بيناسبك فممكن يعملوه بوقت تاني يناسبك.
الفصل القادم من شهر ١ لشهر ٤ اونلاين . لكن الفصول اللي بعدها لسا غير معروف وضعها .
الكليات الخاصة private:
الحكي السابق كان كله للمعاهد العامة
اما الخاصة ففيها عدة فروق
انها ما بتطلب انكليزي حتى تفوتي اي فرع بدكياه لذلك بيستسهلوها بعض الناس لكن بعدين بتبدأ معاناة انو ماعم نفهم انكليزي عالاساتذة. لذلك انا دايما بنصح برفع مستوى اللغة بعدين دخول الاختصاص.
اما من ناحية الأوساب: مبلغ المنحة بيضل نفسه لكن بيروح منه الرسوم الدراسية الخاصة بالكوليج. (الحكومية رخيصة و الخاصة غالية لذلك رح تفرق كتير بالاوساب. )
لذلك العامة افضل جدا من الخاصة
